Në periudhën kur temperaturat fillojnë të ulen, gjithnjë e më shpesh zgjedhim pije të ngrohta dhe ushqyese. Ushqyerja e larmishme, marrja e mjaftueshme e lëngjeve, gjumi cilësor dhe aktiviteti fizik janë pjesë e rëndësishme e kujdesit të përditshëm për organizmin, ndërsa frutat dhe perimet e freskëta mund t’i përfshijmë lehtësisht edhe në pije të shijshme shtëpie.
Ja katër receta të thjeshta.
1. Smoothie me portokall, karotë dhe xhenxhefil
Një pije e freskët dhe aromatike që kombinon fruta dhe perime. Portokalli është burim natyral i vitaminës C, ndërsa karota përmban beta-karoten, të cilin organizmi mund ta shndërrojë në vitaminë A.
Përbërësit e nevojshëm:
- 1 portokall i madh
- 1 karotë mesatare
- ½ banane
- një copë e vogël xhenxhefili të freskët, rreth 1-2 cm
- 100–150 ml ujë
- 1 lugë e vogël lëng limoni
- disa kuba akulli, sipas dëshirës
Përgatitja:
- Qëroni portokallin, karotën dhe xhenxhefilin.
- Pritini karotën dhe bananen në copa më të vogla.
- Vendosini të gjithë përbërësit në blender.
- Shtoni 100 ml ujë dhe përziejini derisa të përftoni një masë të njëtrajtshme.
- Nëse pija është shumë e trashë, shtoni edhe pak ujë.
- Në fund shtoni lëngun e limonit dhe përziejeni shkurt.
- Shërbejeni menjëherë.
Këshillë: Në vend që ta kulloni, lëreni tulin në pije për të ruajtur edhe fibrat bimore.
2. Pije e ngrohtë me mollë, xhenxhefil dhe kanellë
Një pije aromatike vjeshte, e cila mund të jetë një alternativë e këndshme ndaj pijeve të ngrohta të ëmbëlsuara.
Përbërësit e nevojshëm:
- 1 mollë e madhe
- 500 ml ujë
- 3–4 feta të holla xhenxhefili të freskët
- 1 shkop kanelle
- 1–2 feta limoni
- 1 lugë e vogël mjaltë, sipas dëshirës
Përgatitja:
- Lajeni mirë mollën dhe priteni në feta të holla.
- Në një tenxhere të vogël vendosni ujin, mollën, xhenxhefilin dhe kanellën.
- Ngroheni derisa të vlojë dhe më pas uleni temperaturën.
- Lëreni të ziejë në zjarr të ulët për rreth 10–15 minuta.
- Hiqeni nga zjarri dhe lëreni të ftohet pak.
- Shtoni limonin pak para servirjes.
- Nëse dëshironi një shije më të ëmbël, shtoni pak mjaltë kur pija të jetë ngrohur këndshëm dhe të mos jetë më shumë e nxehtë.
Këshillë: Nuk është e nevojshme ta kulloni – fetat e mollës mund t’i lini në filxhan.
3. Smoothie i gjelbër me kivi, spinaq dhe mollë
Një pije e freskët e gjelbër, në të cilën frutat e balancojnë shijen e spinaqit. Kivi është i pasur me vitaminë C, ndërsa kombinimi i frutave dhe perimeve të freskëta është një mënyrë praktike për të shtuar më shumë larmi në menynë e përditshme.
Përbërësit e nevojshëm:
- 2 kivi
- 1 mollë e gjelbër
- 1 grusht spinaq të ri të freskët
- ½ banane
- 150 ml ujë
- 1 lugë e vogël lëng limoni
Përgatitja:
- Qëroni kivit dhe bananen.
- Lani mollën dhe spinaqin.
- Priteni mollën në copa dhe hiqni farat.
- Vendosini të gjithë përbërësit në blender.
- Shtoni ujin dhe përziejini derisa të përftoni një strukturë të njëtrajtshme dhe kremoze.
- Shtoni lëngun e limonit.
- Shërbejeni menjëherë pas përgatitjes.
Këshillë: Për një strukturë më të trashë dhe kremoze, përdorni banane të ngrirë.
4. Pije e artë me kurkumë, xhenxhefil dhe portokall
Kjo recetë kombinon portokallin e freskët me xhenxhefil dhe kurkumë, duke krijuar një pije me aromë intensive dhe ngjyrë karakteristike të artë.
Përbërësit e nevojshëm:
- lëngu i 2 portokajve
- lëngu i ½ limoni
- 1-2 cm xhenxhefil i freskët
- ½ lugë e vogël kurkumë
- një majë piper i zi
- 100 ml ujë
- 1 lugë e vogël mjaltë, sipas dëshirës
Përgatitja:
- Shtrydhni portokajtë dhe limonin.
- Qëroni xhenxhefilin dhe grijeni imët.
- Në një gotë ose enë të vogël përzieni lëngun e portokallit, lëngun e limonit dhe ujin.
- Shtoni xhenxhefilin dhe kurkumën.
- Shtoni një sasi shumë të vogël piperi të zi të sapobluar.
- Përziejeni mirë dhe lëreni pijen të qëndrojë për disa minuta.
- Sipas dëshirës, kullojeni dhe shtoni pak mjaltë.
Këshillë: Nëse dëshironi një shije më të butë, shtoni më shumë ujë ose gjysmë molle dhe përziejeni të gjithë masën në blender.
Zakonet e vogla janë pjesë e kujdesit të përditshëm
Asnjë pije apo ushqim i vetëm nuk mund ta “ndërtojë” imunitetin. Megjithatë, një ushqyerje e larmishme dhe e ekuilibruar mund të sigurojë vitamina, minerale dhe lëndë të tjera ushqyese që i nevojiten organizmit për funksionimin e tij normal.
Pijet e përgatitura në shtëpi me fruta dhe perime të freskëta janë një mënyrë e thjeshtë për të sjellë më shumë larmi në ushqyerje, duke shijuar njëkohësisht diçka të shijshme dhe sezonale.
